هي مش فوضي!!!

-----------------------------------------------------
فما بالك لو كانت حقوقك محفوظة ويحميها القانون والدستور !!
---------------

ان كان لديك عشر دقائق من عمرك
فرجاء اقرأ هذه السطور ,, ولاتتخلى عن حقوقك ..
فربما تكون أنت القدوة و شرارة التغيير القادمة .
------------------------------------



------------------------------------
1- التوقيف .

لو اي حد وقفك في الشارع وقاللك فين بطاقتك . ؟؟؟
تقولله تحت امر حضرتك . بس لازم اعرف مين سيادتك ووقفتني ليه
(القانون بيلزم الظابط اللي لابس مدني او عسكري انه يطلع لك الكارنية.ويعرفك سبب توقيفه ليك)




كده ممكن يضربني او يشتمني ؟
لأ . لانه اولا هيعرف انك عارف حقوقك .. ثانيا .. لو تعدى عليك بالسب او الشتم . هو هيبقى عارف ان العواقب عليه هتكون وخيمة (زي ماهنشرح)

---
هل ممكن اتحبس لو مش معايا بطاقة ؟ وهل ممكن الظابط يحبسني او يسحب البطاقة مني ومايرجعهاش ؟
لأ ..عدم وجود بطاقة لا تعرضك للحبس فقط غرامة مالية لاتزيد عن 200 جنيه ., ومن حقك تتصل بأهلك يجيبولك البطاقة احسن من الغرامة ..

لو الظابط اخد بطاقتك ومرجعهاش يبقى ارتكب جريمة وتعمل محضر في حقه وتقول انه سحب بطاقتك بدون سبب
------------------------------------
------------------------------------
2- التحري.
معناها ان الشرطة توقف الناس اللي في مواقف شبهة وريبة وشك .

هل من حق الشرطة توقف اي حد محل شك , وتسأله عن اسمه وسنه ومحل سكنه ورايح منين وجاي منين ؟
نعم من حقه ولكن مش من حقه يفتشه او ياخده على القسم او يستعمل معاه القوة او يهين كرامته.


لو الظابط قاللك . انا مشتبه فيك ولازم اقبض عليك
.. قولله قانون الاشتباه اتلغى من سنة 93 ومش من حقك تقبض عليا.

نرجع تاني ونقول مش من حق الظابط يقبض عليك او يفتش جيوبك او يسحبك بالقوة على القسم
تقولله . حضرة الظابط .أنا طلعت لك البطاقة , اما انك تفتشني لازم أمر من المحكمة او النيابة بتفتيشي ده وضع غير قانوني وحضرتك المفروض بتنفذ القانون مش بتخالفه.

------------------------------------
------------------------------------
الحالات الحرجة.
ايه اللي هيحصل لو الظابط استعمل القوة معايا .. وفتشني هو والعساكر بالعافية ., او قبض عليا بالعافية ورماني في البوكس ووداني القسم ؟؟ .
الاجراء من اساسه غلط وغير قانوني ... ساعتها لازم تعرف الظابط انك هتشتكيه للمأمور او مفتش الداخلية .. ولو رحت القسم تطلب فورا مقابلة المأمور او نائب المأمور واشرح له اللي حصل
والمأمور بيكون رجل كبير وفاهم حقوق الناس وهيوقع العقوبة على الظابط او الأمين اللي عمل معاك كدا

متنساش تعمل محضر باللي حصل لك ... ولو رفضو يعملو لك محضر تطلع على النيابة او تعمل محضر عند مفتش الداخلية


طيب فرضا عملو لي حاجة اسمها محضر تحري ؟؟..
محضر التحري مش موجود في القانون ومتمضيش عليه .. اتصل بأي حد قريبك وخليهم يبعتو تلغراف او يتصلو بمفتش الداخلية ويقولو انك مقبوض عليك بدون وجه حق
او يجيبو اي محامي وتطلع علطول في لحظتها


اتصل ازاي وهم اخدوا موبايلي ومش هيخلوني اتصل من القسم؟
صرف نفسك ,, خلي اي عسكري يتصل باهلك ... لو دخلت الحجز فيه ناس معاها موبايلات
وبعد الموضوع ماينتهي متنساش تعمل محضر بكل اللي حصل لك

نموذج التلغراف



------------------------------------
------------------------------------
3- القبض.
القبض قرار خطير جدا , يمس الحريات العامة .. ومعناه انه يكتفك بالقوة ويمنعك من الحركة ويحجزك في السجن بسبب ارتكابك جريمة .

معنى انك( مقبوض عليك ) . انه تم اصدار أمر من النيابة أو القاضي بالقبض عليك
أو تم القبض عليك متلبس بجريمة تزيد مدة عقوبتها عن 3 شهور ( بتسرق مثلا ).. ولو حال تم القبض عليك بدون الأحوال السابقة فهذا أجراء باطل وخطير جدا ويجب الابلاغ عنه فورا ..

ايه حقوقك لو أظهر لك قرار من النيابة انك مقبوض عليك ؟؟
* من حقك فورا تعرف سبب القبض عليك وايه هي الاتهامات الموجهة اليك .
* من حقك تتصل بأهلك وتتصل بالمحامي وتطلب مساعدتهم .
* من حقك تعرف اسم وشخصية الظابط اللي قبض عليك .
* من حقك ارتداء ملابسك بالكامل ( ليس من حقهم القبض عليك عاريا )
* من حقك ان تصان كرامتك بالكامل وألا يوجه اليك اي نوع من انواع الاهانة الجسدية او الكلامية وليس من حق احد استعمال العنف معك .
* في حال لو رفضو اعطائك اي حق من حقوقك . فمن حقك في أي وقت القيام بشكوي للمأمور وتبليغها فورا للنيابة العامة .
* ليس من حق الشرطة حجزك لأكثر من 24 ساعة ( تبدأ من لحظة القبض عليك) ولابد من ترحيلك فورا الى النيابة .

لو تم القبض عليك بدون وجه حق او احتجازك أكثر من 24 ساعة تكون غرامة على الظابط وحبسه , لو تم الاعتداء عليك جسديا داخل القسم .. تصل عقوبتها للسجن المشدد للمسئول عن ذلك . انما لو حصلت وفاة لاقدر الله من التعذيب. توجه للظابط تهمة القتل العمد .
العقوبات تكون للظابط الذي اصدر القرار بالتعذيب ( حتى لو لم يضربك بنفسه ) وايضا لمن قام بعملية التعذيب نفسها .

أعمل ايه لو اتقبض عليا بدون وجه حق .. ورفضوا اني اعمل شكوى للمأمور , ورفضو يخلوني اتصل بحد ؟؟
زي ما قلنا تتصرف وتتصل باهلك عن طريق اي حد .. والاهل فورا يبعتو تلغراف لرئيس النيابة .. والنيابة هتحقق فورا في الموضوع وتنزل القسم وتفتشه . ويشوفو دفاتر القبض ,, ولو مفيش عليك امر قبض هيفرجو عنك فورا وهيتعمل قضية للظابط اللي قبض عليك بشرط انك تتهمه بالاسم.

------------------------------------
------------------------------------
4- الاستدعاء.
عرفنا القبض .. طيب لما يجيني واحد مخبر وبيقوللك جايلك استدعاء من الظابط في القسم.. ؟؟
الاستدعاء ده طلب من الظابط في وبيكون بدون أمر من النيابة .. لانهم ربما طالبين ياخدو اقوالك في جريمة حصلت .ولازم المخبر يديك ورقة فيها طلب الاستدعاء. طبعا من حقك انك تروح الاستدعاء او متروحش الاستدعاء .. ده شيىء يرجع لك .

* من حقك تروح مع المخبر او متروحش . براحتك .
* مش من حق المخبر ياخد بطاقتك على اساس انك لازم تروح .
* لو مرحتش الاستدعاء مش من حقهم يقبضو عليك بالعافية وتروح القسم .
* ممكن تبعت المحامي بتاعك للقسم يستفسر عن الموضوع , او تروح مع المحامي بتاعك, او يروح المحامي بدل منك يرد على كل الاسئلة وانت قاعد في بيتك باشا بتتفرج على التلفزيون .


لما يجيني واحد مخبر ويسلمني " طلب حضور " امام النيابة ؟؟
طالما فيها نيابة يبقى المفروض انك تروح النيابة . ولو مش هتروح يبقى لازم يكون عندك عذر قوي تقبله النيابة .

------------------------------------
------------------------------------
5- التثبيت.

لو انا قاعد في مطعم او قهوة ودخلت قوة من الشرطة وقالت" كله يثبت مكانه " .. لانهم بيفتشوا عن مجرم ... في حال لو انا مسمعتش الكلام وجريت . هل من حقهم يقبضو عليا ؟؟
لو انت مش المجرم .. يبقى اكيد لأ مش من حقهم يقبضو عليك .. انت فقط خالفت اوامر الشرطة ودي مخالفة لاتتعدى قيمتها 30 جنيه .

لو انا مواطن عادي شفت حرامي بيسرق ينفع اثبته او اقبض عليه وافتشه أو اضربه؟؟
مش من حقك انه تقبض عليه او تفشته أو تضربه او تهين كرامته .. حقك الوحيد انك تثبته مكانه وتسلمه للشرطة . او تحجزه في مكان ما لحد ما تيجي النجدة .
------------------------------------
------------------------------------
6- التفتيش .
لو خبطو عليا باب البيت وقاللي عندنا أمر بالتفتيش .. اعمل ايه ؟
ساعتها تمسك اعصابك واوعى تتهور .. لازم تشوف كارنيه الظابط اللي هيعمل التفتيش وتشوف اذن التفتيش .وتتأكد انه سليم .. يكون صادر من النيابة المختصة ومكتوب فيه سبب التفتيش والجريمة التي بسببها يكون التفتيش .وتاريخ التفتيش .

من حقك ان محدش يفتشك او يفتش بيتك الا لما تشوف اذن التفتيش وتتأكد انه سليم . وساري المفعول . ومكان التفتيش ,(( انت فقط ولا انت وعربيتك ولا انت وشقتك , ولا انت والناس اللي معاك )) ,, وتعترض لو حاولو يفتشو في مكان مش مكتوب في الاذن .

تفتيش البيت : لابد من الحفاظ على الممتلكات النقدية او المجوهرات وغيرها .. وفي حال اختفاؤها اثناء التفتيش قم بعمل محضر .. وفي حال تكسير أي عفش في البيت يكونو قد ارتكبو جريمة اتلاف وتعسف , وتتصل بالنجدة يجو يعاينو التلفيات .

لو ان أمر التفتيش بخصوص سرقة مستندات او مجوهرات .. فلو وجد الظابط مثلا ممنوعات في بيتك.. لايجوز له عمل قضية ثانية ومحضر ثاني بالممنوعات. لانه بذلك تمادي فى استعمال اذن التفتيش .. ومحضر الممنوعات لا أساس له من الصحة .



تفتيش الانثى؟ :لابد ان تقوم به أنثى مثلها . الظابط من حقه فقط تفتيش شنطة الانثى أو فتح كف يد الانثي بالقوة , خلاف ذلك أو لمس اي جزء في جسدها فهذه تعتبر قضية هتك عرض أنثى ولو معك شهود .. الظابط يروح في ستين داهية .

هل معقول في القسم يعملو محضر هتك عرض انثى لظابط مباحث موجود في القسم ؟؟؟
المفروض نعم وتمسك بحقوقك , ولو واجهت صعوبات او منعوك .. توجه فورا الى المديرية وقابل مفتش الداخلية ,, او اعمل محضر في النيابة .

هل لو تم تفتيشي غصب عني , او لأني خائف ان يتم تلفيق قضية لي أو لأهلي .. ما الحل ؟
التفتيش غصب عنك او تحت الخوف والتهديد يبطل اجراء التفتيش من اساسه .


واحد ممكن يقوللي , طالما انا سليم ... اخاف ليه من التفتيش ؟؟ ما انا اخليه يفتشني وخلاص ,, انا مش ناقص وجع دماغ !!!
مفيش حاجة اسمها يفتشني وخلاص . دي حقى وحقك,, والحريات العامة دي مش لعبة . ثانيا لو قبلت التفتيش يبقى انت عملت حاجة في القانون اسمها "التفتيش بالرضا " وساعتها يبقى سقط حقك في الرفض .. وهتكون كل الاجراءات المتبعة للتفتيش قانونية .. يعني لو مسك عندك اي حاجة مش قانونية ( مثلا سلاح صيد غير مرخص) يبقى دي حالة تلبس وساعتها ياحلو يقبض عليك طالما التفتيش سليم وانت وافقت عليه بدون تهديد او أكراه .


------------------------------------
------------------------------------
7- التلفيق.
يعني ظابط يحط حتة حشيش او سلاح لشخص برىء,, ويقول انه تلبس .. ويقبض عليه .

ليه دايما الظباط هم اللي بيلفقو لك التهم .. مش الامناء او المخبرين ؟؟
علشان المحامين بياخدو شهادة الظباط في المحكمة ولو الامناء قالو انهم اللي مسكو التلبس .. ساعتها هتاخد براءه.

أعمل ايه لو حصل لي تلفيق قضية ؟؟ أثبت ازاي حدوث التلفيق ؟
في معظم الحالات قضايا التلفيق بتثبت .. ولكن علشان تثبت حدوث التلفيق أهم شيىء .
* شهادة الشهود الموجودين في المكان وقتها . وهم يثبتو كذب الظابط .
* ارسال تلغرافاات فورا للنائب العام ورئيس النيابة ووزير الداخلية ومفتش الداخلية .بالادلة وشهادة الشهود .
* تقارير الخبراء الفنيين ... وفي حالات كثير جدا تم اثبات التلفيق وعندها وزارة الداخلية لاترحم أي ظابط لأنه بيسيىء لسمعة وزارة الداخلة . وتوقع عليه اقصى عقوبة .


لو الظابط فتشني غصب عني بدون رضايا . ولفق لي حتة حشيش او سلاح .. اعمل ايه ؟
لو االظابط فتشك بدون اذن من المحكمة وبدون رضاك .. يبقى رسميا ارتكب جريمة تلفيق تهمة .. ويقع تحت طائلة القانون . ويحبس .



------------------------------------
------------------------------------
8- الكمين.
لفظ غلط ابتدعه الحرامية عن لجنة الامن والنظام اللي بتعملها الشرطة .. اصل عيب لما نقول الشرطة تعمل كمين للشعب .. احنا مش حرامية !!!!

هل من حق الظابط يسحب رخصة القيادة أو رخصة التسيير ؟
نعم لو معك أحداهما وليس معك الاخرى .. يعني لو معك رخصة قيادة وليس معك رخصة تسيير .. تسحب رخصة القيادة . والعكس .

لو معي بنت في العربية . هل من حق الظابط يسألني .. مين دي ؟
* لا مش من حقه يسألك مين دي ولكن (ريحه وقولله دي مراتي ) ... من حقه يطلب بطاقتها فقط ..
* مش من حقه ينزلها من العربية او ياخدها على جنب ويسألها لوحدها .وممنوع تماما تفتيشها . (ارجع لجزئية تفتيش الانثي)



لو الظابط قاللي افتح شنطة العربية او طلب مني انزل علشان افتش العربية .. هل من حقهم يفتشوها ؟؟
لا مش من حق الظابط يفتش شنطة عربية ولا حتى صالون العربية بدون اذن تفتيش , وارفض فتح شنطة عربيتك . وقولله انا رخصي سليمة ومش متلبس ولامحل شك ولا حرامي .. وانا وانت عارفين الاجراءات كويس . وده مخالف للقانون .

طيب معروف ان الظباط بيقفو مع بعض بعيد ويبعتو الامناء او المخبرين والعساكر يشوفو ويسحبو الرخص .. ساعتها اعمل ايه ؟
حضرتك تركن العربية بمنتهى الجنتله وتنزل منها وتروح للظابط وتوري له الرخص .. وتقولله انا عارف ان سيادتك بس اللي من حقك تشوف الرخص . مش الامين او العسكري .

طيب لو ركني جنبه أو أخدني على القسم .
في حال الاشتباه المفروض الظابط يركنك جنبه مدة لاتزيد عن نصف ساعة للتحرى عنك .ولو طالت المدة أو سحبك على القسم اتصل باهلك وصمم انك تعمل محضر بالواقعة واللي حصل لك . ومتتنازلش عن حقك ,,

سحب الرخص تكون في كل الاحوال من( الظابط فقط ) وليس من الامناء او العساكر .. ولابد من اعطائك وصل بسحب الرخصة .

-------------------------------------------

يسألني أحدهم .. طيب وقانون الطوارىء ؟؟
قانون الطوارىء الظالم للأسف مجبورون عليه... واهم مافيه على الاتي :
تدبير تلجأ إلية الجهات الأمنية بحبس شخص بشرط:
تري فيه أنه من الخطرين والمشتبه فيهم ويقصد منه المحافظة علي الأمن والنظام العام .
أن يكون خطرا على الامن العام .

وفي الاحوال العادية الشخص العادي لايكون مشتبه فيه ولايكون خطرا على الامن العام
واجراءات الحبس والاستجواب تتم بحسب القانون والدستور .


معلومات بسيطة عن الظباط :
* كلمهم باحترام وعرفهم باحترام انك بتحترم نفسك وعارف حقوقك وساعتها هيحترموك .
* بيزعلو لو مش بتناديهم بألقابهم .. يعني العقيد بيزعل ويضايق لو قلت يا سيادة النقيب .. ريح نفسك وقولله يا فندم ... (بيه وباشا دي اتلغت) .
* بلاش تستفزهم او تتصرف معاهم بتهور . او حتى تعترض عليهم جسديا , لانهم ممكن يلبسوك قضية التعدى على موظف عام ومنع تحقيق العدالة ... فقط اعرف حقوقك وخذ الامور بسياسة واثبت كل اللي حصل لك في محضر ولاتتنازل عن حقوقك .
* ظباط الشرطة ملهمش حصانة وبيتحاكمو زي أي حد , بالعكس دول بيتسألو مرتين . مرة قدام النيابة والمحكمة ومرة قدام جهة شغلهم.
* جريمة التعذيب لا تسقط بالتقادم .. يعني من حقك في أي وقت وفي أي زمان تتقدم بشكوى انك تعرضت لاعتداء او تعذيب من ظابط .

------------------------------------
------------------------------------
- ختاما.

اظن دلوقتي عرفت ان القانون المصري مفيش فيه وزير ولا غفير .. مفيش فيه غني ولا فقير . ومفيش فيه واحد واصل وواحد ملوش ضهر.

الموضوع وما فيه انك تعرف كيف تأخذ حقك كاملا بالقانون ... وأن تعرف حقوقك ولا تفرط فيها

-------------------------------------------------

الكلام كويس اوى يامكرم دة عشان حقنا
لكن ياترى هناخد حقنا كدة؟؟؟؟؟؟؟؟؟
كلة هيتفق مع بعضة عليك

الكلام سهل لكن التنفيذ صعب
انا مش بحبطك بس دى الحقيقة

تقبل مرورى